انا حقتك
انا حقتك …
انا نخله .. بتغازل سماك
تحلم تصل لي قمتك ..
انا شتله .. تتشابي لعلاك
كانت بدايتا بذرتك ..
انا رحله .. سدرة منتهاك
خطواتي دايما رفقتك ..
وانا طفله بلعب حجله فيك
وبكوس شليلي في قمرتك ..
وانا حقتك
انا بسمه .. في وش جيش اساك
تهزم جحافل دمعتك …
انا نسمه .. ضد نيران جفاك
تنزل سلام فوق لوعتك …
انا كلمه .. تشرح محتواك تحمل يقينك .. فكرتك ..
انا لحظة الشوف في عماك
قنديل بصاحب ظلمتك ..
وانا حقتك
انا فرحه .. ضحكة تضوي فاك
انا ناي بيعشق نغمتك ..
انا قمحه .. زادك للوراك
في كل سنبله دستك ..
انا لمحه ما بتشبه سواك
(المشية زاتها وقدلتك ) ..
انا سمحه بيك ومجمالك
انا لون بيكمل لوحتك ..
انا حقتك ..
انا … انت …
في حنك .. جفاك …
ضعفك .. قواك ..
كسرة غرورك وسطوتك ..
احترت ..
ايه ح اكون بلاك؟ !!
وات دون خطاي وين سكتك؟!!!
وازددت فخرا بانتماءك ..
اصبحت رضوان جنتك ..
انا لا نبيه .. ولا ملاك
بس زوله بالجد رادتك ..
وانا حقتك ..