الشعراء كضابين
الشعراء كضابين
خامنكم احساس
شايلين شعوركم داك
سايقنو بالغابة؟؟
قال:
يوم داكا شفت ملاك
مليانة ريد وحنان
عيونها جذابة
بتبعثر الإحساس
يوماتي في بالي
لامرة حنت لي
ولا كنت في حسابا
بالليل كتبت قصيد
ناديتها بالكلمات
سمعت انيني وجات
قالت :
بريدك ريد
والريدة منسابة
فبقينا احلى اتنين
يوم نمشي للمريخ
ومرات زحل مرات
نسرح مع القمرة
ونسة وشليل وين راح
افراحنا ليل وصباح
نتمشى في الرملة
أو نمتطي سحابة
لا دقيقة بس كيفن؟
رملة وسحاب وقمر؟
كيف كنتوا في المريخ
كيف عشتوا يعني شهر
والعيش قد طابَ
قال :
في حضرة الاحساس
نتنفس الريدة
نشبع حنين وغرام
كم دفتر وقصيدة
لكن كما قد قيل
بنضيع مع الاحساس
زي الشليل بالليل
وبقولوا كضابين
الشعراء كضابين
خامنكم احساس
شايلين شعوركم داك
سايقنو بالغابة؟!
إذن الحنين كضاب
كضاب شعور الريد
كضاب كلام حميد
اغاني تتنفس
عبق المحنة قصيد
مش قلتوا كضابين؟!
انا زاتي كضابة