الناس للناس والكل للرب
الناس بالناس والكل للرب
تعال يا حبيب يلاك قرب ..
نفتح نفاج أفراح القلب ..
نرمي الأحزان في أعمق جب ..
ننسى الآلام وكل هم وتعب ..
نتشايل ونسند لكتوفنا .. وكل شي بأخوك ما ببقى صعب ..
يلانا ننضف جوانا .. ننهض بنفوسنا نخلي كضب ..
ونعيش أفراح ونعيش في سرور ..
وسعادة وإلفة نعيش بالحب ..
ما نشيلها هموم ليوم باكر ..
بالعيشة في يوم ما نتغلب ..
ما نشيلها همومنا وتكسرنا ..
خليها ل الله بتترتب..
ويا اخوانا الجايطة بتترتب ..
ووالله الجايطة بتترتب ..
بس انت اتوكل وما تتعب ..
أعمل أعمالك واتأدب ..
الدنيا يا ناس ما بتتطلب ..
غيرة وحيرة ونفور وغضب ..
سامح للناس أبقى الأطيب ..
أصل القاطعك والفات غررب ..
سامح للناس وأولى الأقرب ..
خليك للكل ما تتحزب ..
والبينكم عامرة وما بتخرب ..
بين الفقران والليهو حسب ..
خليك واحد ما تتكبكب ..
ما تحلي لسانك شان تكسب ..
خليك واااضح ما تكوس لسبب ..
صاحب الوشين والله كعب ..
اتجاوز شان تكسب غيرك ..
ورضا الرحمن أعظم مكسب ..
جاهد في حياتك واتفانى ..
ما تقول ما بقدر ولا صعب ..
ما الدنيا ممر والدنيا بلاء ..
اصبر في ممرك واتكررب ..
شان تلقى مقرك في الجنات ..
بجوار الأكرم والأطيب ..
دا حبيبنا شفيعنا وقائدنا ..
من زادو صلاة صار الأقرب ..
ياخ عاون غيرك شان نفسك ..
ما الناس للناس والكل للرب ..