الزوجة ما ساكت مرة
الزوجة .. ما ساكت مرة ..
تختارا من باقي الحريم
وتجيبا تحرس غرفتك
والزوجة .. ماها تياب حرير ..
لا ملاية لا فرش سرير
الزوجة ليك معدن أصيل ..
طشيت بتصبح ليك دليل ..
في شدتك شجرة نخيل ..
تعطش عشانك تبقى نيل ..
وتجوع بتصبح لقمتك
الزوجة .. رحمة من الكريم ..
نور في ظلامك ودنيتك ..
تزعل تشيل زعلك بعيد ..
تحزن تفتّش فرحتك ..
تنزل دموعك بالغلط ..
بي سرعة بتقش دمعتك ..
تبقالك الخل الوفي ..
وتبقالك الأخو والرفيق ..
وتحفظ كرامتك وسمعتك ..
بترعى لي امك وابوك ….
مصلّاية في ساعة وضووك ..
وبعد تصلي هي سبحتك ..
الزوجة .. تقطع قلبا عشان رضاك ..
وتكون سعيده عشان معاك ..
تحفظ أمانتك وراك ..
وتدعيلك الله يوفّقك ..
الزوجة .. ما مكوه وغسيل ..
قهوة وقرنفل وجنزبيل ..
بتعيش معاك كان بالقليل ..
الزوجة صينية فطور ..
شاهيك وفنجان قهوتك ..
سكر إذا مسخت عليك ..
الدنيا او يوم خانتك ..
الزوجة .. في فهمي البسيط ..
ما بتحكي حالك للغريب ..
ما اظن تقارنك بالقريب ..
وصريحة لي ابعد حدود ..
ولو غبته سرّك تحفّظو ..
وتهوى وتقدس تربتك ..