عايزة اسافر
عايز أسافر
عايز أسيب الدنيا
والنَّاس والمآسي
عايز أضمِّد جرحي
والوجع الملاني
وأبقى قاسي
وأنسى آلامي وجروحي
وأبقى لى قلبي المُواسي
واعتزِل كلّ البيألِّم
وابتعد من كل ناسي
وأبدا صفحة جديدة جدّاً
فيها اكتب يا قليبي
(أنسى واعتاد التناسي)
عايزه اهاجر
عايزه أغيب عن كل قسوة
وكلّ ظالم وكلّ غادر
وأنسى كلّ الجرّحوني
ولي محطّاتون أغادر
وأبقى زيّ النيل بيجري
وأبقى زيّ الطير مهاجر
عايزه ألقى رويحتي تاني
وأنسى فكرة اني “شاعر”
مالقيت من شعري راحة
و أيه لقينا من المشاعر ؟!
عايزة أبعد وأبعد اكتر
ما البعاد مرات سعادة
أصلي كلما اقول لقيتا
تعتذر ويخيب ميعادا
والدمع اصبح صديقي
والحزن صار ليّا عادة
وانتهت لهفة غرامي
وجفّت اشعاري ومدادا
بعرف انو البعد قاسي
والرحيل محتاج إرادة
الا بس يمكن يريِّح
والسفر مرات عبادة
وكلّ حاجة بتبقى أجمل
لما تتشاف في بُعادا
يا قلب باكي وموجَّع
وَيَا مصايب وَيَا جروح
عذَّبت وجداني جداً
وأتلفت جوايا روح
الا ما كتبتْ نهايتي
ولسه بُستاني بيفوح
بكرة تفرح يا قليبي
تهدا وآلامك تروح
والفرح يرجع يزورك
وفِي سماواتك يلوح